Im Friehjohr 1999 wurd - als ordentlich ohner gsuffe worrn is - beschlosse,
des Heringer Gebabbel mid schäine Mussig in de Weld zu veträre. Schnell
wohrn siewwe Ochse gefunne, die sich donn heegehoggd häwwe und den gonze
Mouz wou sou innem Ord bassierd uffgeschrewe houn.

Die ersde Liere wohrn schnell gschrewe, me musst sich nur e bissjie
rumhejiern un umgugge - die meisde Texte schreibt immer noch es Lewwe. Uff
de Kerb im September 99 wohrs donn soweid: Mer wolld de Lait de Krembel emol
vortroache und hodd sisch noch iwwerlescht, wiemes om bestde Mache deed.
Also hodme sisch gedenkt mer maches mol wieä Band un de ersde Ufftritt wurd
gemeistert! H-Borrm (die Band!) wor do!

Un ougefonge hots on Kerb (Textzeile aus "Mussig")

Eischendlich solld des Gonze mit dem ahne Ufftritt gegesse soi - awwer die
Leit im Publikum häwwe sou en Zerkus gemohcht, das me de Entschluss gfasst
hot, die schäi Sach net oafach sterwe zu losse.

In de folschende Johrn sinnse donn noch oahmol uf de Kerb uffgetrere. Äwwer
eischentlisch is de Krembel donn doch e wing oigeschloofe, weil kohner vun
denne Ochse sisch emol Zeit genumme hot weirre zu mache!
Es hot donn werklisch long gedauert, bis die verrigde werre uffde Kerb
uffgetrere sinn. Im Herbst 2005 wors donn soweit, me hot den olde Krembel
nochemol erausgehold und schee Mussig uff de Kerb gemocht.
Des hot donn zufällisch ohner middkrieet, un zu dene Buwe gesäät, mer hot
des sou guud gefalle, ehr missd achemol in Darmstadt zeische, dasses schäi
Mussig im Ourewold gid. Also sin die Kabbe noch de Kerb nochemol uff
Darmstadt gefohrn un hewwe es Ansibin geroggd.
In de Silvesternoocht 2006 hot me donn sou beisommegestonne un hot
festgestellt, dass des schun gonzschäi Spass mache Dud, un dasses de Laid jo
aach gefalle dud. Also Hot me beschlosse des jetz doch räjelmäßisch zu
mache.

De Rieme lag sou zu saache uff de Ojiel un om Schluss vun dem Owend de Lollo
vor de Bar uffem Buckel.

Es sinn donn noch e poar onnern gude Ufftritte dezukumme. Die immer mejihner
und rockischer geschrehwenere Lierrer sinn in Werkstätte, Bierzelte, uff
Bulldoggrolle, Debbische unn uff Bunde Owende uffgefiehrt worrn. Inzwische
zu sechst, hot sich H-Borrm en Nohme als Band fer seldsome Ufftritte onn
unbassende Ordde gemocht.

Im Summer 2006 häwwese donn em Jochen ... soi Studio ausenonnergenumme un
emol fünf schäine Liere uff e Scheibsche Mussig presse losse

Die Gschicht gaid weirre...

 

[HOME] [Impressum] [Datenschutzerklärung]

a